Adolygu'r broses diogelu oedolion (amddiffyn oedolion)
Diben yr adolygiad yw sicrhau bod y grŵp strategaeth wedi cwblhau’r camau a nodwyd yn y cynllun a phenderfynu a oes angen cynllun o hyd. Os oes angen cynllun, dylent ystyried a oes angen unrhyw gamau ychwanegol neu wahanol. Mae’n bwysig nodi na fydd angen cynnal adolygiadau ym mhob achos.
Dylai’r rŵp strategaeth adolygu’r cynllun amddiffyn gofal a chymorth yn rheolaidd er mwyn sicrhau nad oes unrhyw berygl y caiff yr oedolyn ei gam-drin ac esgeuluso a bod ei anghenion gofal a chymorth yn cael eu diwallu.
Dylai’r amserlen adolygu ganolbwyntio ar yr unigolyn gan adlewyrchu ei amgylchiadau unigol ac anghenion amddiffyn. Dylid cynnal adolygiadau cynlluniau amddiffyn gofal a chymorth o leiaf bob 6 wythnos.
Dylai penderfyniadau o ran rhoi’r gorau i’r broses diogelu oedolion gael eu gwneud gan, neu mewn cytundeb â’r awdurdod lleol. Bydd hyn yn berthnasol pan fo rôl y cydlynydd arweiniol wedi’i ddirprwyo i asiantaeth arall e.e. iechyd.
Mewn achosion pan fo'r broses ddiogelu yn dod i ben (Penderfyniad 3) mae’n bosibl y bydd gan yr oedolyn sy’n wynebu risg anghenion gofal a chymorth parhaus. Dylai'r tîm rheoli gofal adolygu’r anghenion dan sylw yn unol ag Adran 4 Deddf Gwasanaethau Cymdeithasol a Llesiant (Cymru) 2014.
Siart Lif 3: Ymchwiliad Ffurfiol
Adolygu’r cynllun amddiffyn gofal a chymorth
P’un ai mewn cyfarfod strategaeth, cynhadledd amddiffyn oedolyn neu gyfarfod adolygu penodol, dylid rhoi ystyriaeth i’r cwestiynau canlynol:
- pa dystiolaeth sy'n dangos nad oes angen y cynllun amddiffyn gofal a chymorth mwyach gan nad yw’r oedolyn yn wynebu risg o niwed?
- a oes angen cynllun gofal a chymorth dan Ran 4 Deddf Gwasanaethau Cymdeithasol a Llesiant (Cymru) 2014?
neu
- pa dystiolaeth sy’n dangos y dylid parhau â’r cynllun amddiffyn gofal a chymorth a/neu ei adolygu i amddiffyn oedolyn sy’n wynebu risg gael ei gam-drin a’i esgeuluso.
- a yw amgylchiadau’r oedolyn sy’n wynebu risg wedi newid a pha effaith gaiff hynny ar y perygl iddo gael ei gam-drin neu ei esgeuluso?
- a ellir cyflawni’r canlyniadau a ddymunir drwy adolygu’r cynllun presennol? Os felly, pa newidiadau y dylid eu gwneud i’r cynllun?
- pa amserlenni y dylid eu gosod o ran rhoi'r cynllun ar waith a'i adolygu?
- oes angen i ni newid yr ymarferwyr sy'n gweithio ar y cynllun a/neu adolygu eu rolau a chyfrifoldebau?
- a yw’r newid o ran yr amgylchiadau a’r peryglon newydd a nodwyd yn beryglon na ellir mynd i'r afael â nhw yn y cynllun presennol? Os felly, a oes angen cynnal ymholiadau adran 126 newydd i benderfynu pa gamau y dylid eu rhoi ar waith i sicrhau bod yr oedolyn sy’n wynebu risg yn ddiogel?
Awgrymiadau Ymarfer: Agenda ar gyfer Cyfarfodydd Adolygu
Cyfranogiad yr oedolyn sy’n wynebu risg yn yr adolygiad o’i gynllun diogelu gofal a chymorth
Dylid helpu’r oedolyn sy’n wynebu risg i arwain y gwaith o gadarnhau a yw’r cynllun yn effeithiol neu beidio. Efallai y bydd yr oedolyn yn dymuno dod ag eiriolwr gydag ef. Os yw’r oedolyn sy’n wynebu risg wedi’i asesu fel oedolyn nad oes ganddo’r galluedd meddyliol i wneud penderfyniadau am y cynllun amddiffyn gofal a chymorth yna dylid gwahodd yr unigolyn sy’n gweithredu i sicrhau ei fudd pennaf.
Mae’n hanfodol bod tystiolaeth am y newidiadau i safon ei fywyd bob dydd, mewn perthynas â theimlo’n ddiogel a bod yn ddiogel, yn ganolog i'r broses gwneud penderfyniadau. Dylid rhoi gwybodaeth i’r oedolyn sy’n wynebu risg am ddewisiadau y gellid eu cynnwys yn y cynllun i sicrhau ei fod yn canolbwyntio’n fwy ar y person.