Cefnogaeth a Rhannu Gwybodaeth ar gyfer Unigolion sy’n Destun Honiadau

Rhaid i gyflogwyr wneud y canlynol:

• Rhoi gwybod i’r unigolyn cyn gynted â phosibl. Gall Swyddog Dynodedig yr Awdurdod Lleol/Swyddog Dynodedig Diogelu roi arweiniad ynghylch pa wybodaeth y gellir ei darparu ym mhob cam. Rhaid adolygu faint o fanylion a gwybodaeth a rennir ar bob cam o’r broses. Ni ddylid cadw natur yr honiad yn ôl oddi wrth yr unigolyn oni bai fod rhesymau penodol wedi’u dogfennu dros wneud hynny, h.y. gallai roi eraill mewn perygl neu lesteirio ymchwiliad troseddol. Rhaid adolygu hyn yn rheolaidd drwy gydol y broses a’i gofnodi. Rhaid rhannu manylion â’r unigolyn pan fydd yn ddiogel ac yn briodol gwneud hynny. Gofyn am gyngor ac arweiniad gan Swyddog Dynodedig yr Awdurdod Lleol/Swyddog Dynodedig Diogelu ynghylch rhannu gwybodaeth
• Rhoi cefnogaeth i’r unigolyn a darparu cyswllt llesiant/lles a enwir yn y sefydliad – Nid cyfrifoldeb Swyddog Dynodedig yr Awdurdod Lleol/Swyddog Dynodedig Diogelu yw hyn
• Trin yr unigolyn yn deg ac yn onest a’i helpu i ddeall yr honiad a wnaed (os yw’n ddiogel gwneud hynny) a’r prosesau dan sylw

Y cyflogwr fydd yn gwneud unrhyw benderfyniadau mewnol am gyflogaeth. Nid yw’n benderfyniad i Swyddog Dynodedig yr Awdurdod Lleol/Swyddog Dynodedig Diogelu.

Fodd bynnag, bydd y broses hon yn parhau beth bynnag fo statws cyflogaeth yr unigolyn.

Os yw’r honiad wedi’i wneud mewn perthynas â gofalwr maeth neu ofalwr lleoliad oedolion, dylid rhoi gwybod iddo fod honiad wedi’i wneud gan y rheolwr cofrestredig neu’r dirprwy.

Rhaid rhoi cyfle i’r unigolyn roi ei adroddiad a’i ymateb i honiadau a wneir, lle nad oes unrhyw ymchwiliadau eraill yn rhedeg ochr yn ochr â’i gilydd h.y. ymchwiliad troseddol. Dylai llais yr unigolyn y gwnaed yr honiad yn ei erbyn gael ei adlewyrchu ym mhroses cyfarfod strategaeth adran 5. Lle nad oes ymchwiliadau troseddol ar y gweill ar yr un pryd, dylai’r cyflogwr (yn amodol ar ganiatâd ei weithiwr) roi disgrifiad o ymateb yr unigolyn i’r honiadau hyd eithaf ei allu; unrhyw wybodaeth berthnasol; unrhyw wybodaeth canfod ffeithiau a gafwyd. Dylid ailedrych ar hyn ym mhob cyfarfod strategaeth proffesiynol a gynhelir.

Rhaid trin unigolion y gwnaed honiadau yn eu herbyn yn deg a rhaid cynnwys eu barn yn y broses. Yn gyffredinol, cyfrifoldeb y cyflogwr (neu unigolyn tebyg a nodir) fydd cael barn ac adborth gan yr unigolyn.