Rôl a Chyfrifoldebau Swyddog Dynodedig yr Awdurdod Lleol/Swyddog Dynodedig Diogelu

Rhaid i bob Awdurdod Lleol gael swyddog dynodedig sy’n uwch reolwr sy’n gyfrifol ac yn atebol am reoli a monitro honiadau/pryderon yn erbyn ymarferwyr a’r rhai sydd mewn sefyllfa o ymddiriedaeth. Yr enw ar y swydd hon fydd Swyddog Dynodedig yr Awdurdod Lleol. Fel arfer, mae Swyddog Dynodedig yr Awdurdod Lleol yn weithiwr cymdeithasol cofrestredig ac mae’n rhaid iddo feddu ar y sgiliau, yr wybodaeth a’r profiad helaeth sydd eu hangen ym maes diogelu. Rhaid sefydlu rôl Swyddog Dynodedig yr Awdurdod Lleol a swyddogaethau cysylltiedig yn ardal gwasanaethau cymdeithasol yr Awdurdod Lleol. Gellir dirprwyo’r rôl i swyddogion dynodedig yn yr awdurdod lleol a’i galw’n Swyddogion Dynodedig Diogelu. Fel arfer, mae Swyddog Dynodedig Diogelu yn weithiwr cymdeithasol cofrestredig ac mae’n rhaid iddo feddu ar y sgiliau, yr wybodaeth a’r profiad helaeth sydd eu hangen ym maes diogelu. Gall y swyddog dynodedig diogelu gyflawni rôl a swyddogaethau dirprwyedig Swyddog Dynodedig yr Awdurdod Lleol. Rhaid i’r rôl hon fod wedi’i lleoli yn ardal Gwasanaethau Cymdeithasol yr Awdurdod Lleol.

Rolau a Chyfrifoldebau:

• Penderfyniadau trothwy
• Sicrhau tegwch
• Hyrwyddo llais y plentyn/oedolyn sy’n wynebu risg yn y broses (lle bo angen)
• Rhoi cyfle yng Nghyfarfodydd Strategaeth Adran 5 i adlewyrchu’r ymatebion a llais yr unigolyn y gwnaed honiad yn ei erbyn.
• Sicrhau cyfathrebu gyda’r gweithwyr cymdeithasol/rheolwyr perthnasol sy’n cynnal asesiadau/ymholiadau Rhan 3.
• Cydlynu’r camau y mae angen eu cymryd a nodi unigolion cyfrifol
• Cynnal barn broffesiynol gadarn wrth wneud penderfyniadau a rheoli pob atgyfeiriad a wneir mewn perthynas â honiadau yn erbyn ymarferwyr
• Dal cyflogwyr, rheoleiddwyr a chyrff proffesiynol i gyfrif wrth fwrw ymlaen â chamau gweithredu a chefnogi eu gweithwyr drwy gydol y broses
• Rhoi cyngor a chefnogaeth i’r rheini sy’n llunio adroddiadau neu’n gofyn am gyngor/arweiniad i benderfynu a ddylid gwneud adroddiad
• Canfod pa wybodaeth a ddarparwyd i unigolion mewn perthynas â’r honiad a wnaed yn eu herbyn. Ailedrych ar hyn ym mhob Cyfarfod Strategaeth Adran 5 i benderfynu a yw lefel/manylion yr hyn y gellir ei ddarparu wedi newid oherwydd penderfyniadau i beidio ag ymchwilio h.y. penderfyniad yr Heddlu i beidio â mynd ar drywydd ymchwiliad troseddol.
• Uwchgyfeirio materion o fewn yr Awdurdod Lleol sy’n cael effaith sylweddol ac a allai ennyn diddordeb y cyfryngau
• Sefydlu a yw’r unigolyn yn gweithio/gwirfoddoli gydag unrhyw sefydliadau eraill sy’n dod ag ef i gysylltiad ag oedolion sy’n wynebu risg/plant
• Sefydlu a oes gan yr unigolyn gyfrifoldebau gofalu am oedolion sy’n wynebu risg/plant
• Sicrhau bod yr holl gynrychiolwyr perthnasol yn cael eu gwahodd i gymryd rhan ym mhroses Cyfarfod Strategaeth Adran 5. Canolbwyntio’n benodol ar sicrhau bod unrhyw gyrff rheoleiddio perthnasol yn cael eu hysbysu/gwahodd/cynrychioli.
• Cefnogi’r grŵp proffesiynol yn y cyfarfod Adran 5 i ddod i benderfyniad ynghylch y canlyniad.
• Cefnogi cyfranogwyr yn y cyfarfod Adran 5 i ddeall a chefnogi’r gwaith o ganfod risgiau cadarn os oes angen.
• Rhoi adborth ysgrifenedig i unigolion ar ddiwedd y broses gyda’r penderfyniadau canlyniad ac unrhyw risgiau a nodwyd.
  DS nid yw hyn yn dirymu angen na chyfrifoldeb y cyflogwr i roi’r wybodaeth ddiweddaraf i unigolion ar y diwedd
• Sicrhau bod adroddiadau/atgyfeiriadau, penderfyniadau, cofnod o drafodaethau/cyfarfodydd yn cael eu cofnodi yn systemau cofnodi cytunedig yr Awdurdod Lleol.

Rhaid i Swyddog Dynodedig yr Awdurdod Lleol/Swyddog Dynodedig Diogelu sicrhau bod monitro rheolaidd yn digwydd rhwng cyfarfodydd strategaeth Adran 5 lle mae ymchwiliadau hir neu hir i sicrhau y gellir cwblhau materion yn brydlon.